1
男
Laj mohdingh basouj
Moux haeux baenz cien.
Ngoenz neix himgq fungh nienz
Hek fuengfueng canj daeuj
脚
Cenz mbanj caez sim dong
Gwn ciet ngoenz gouj
Ngoenzneix daeuj daengz neix
Raen gaiq heij fouxyienz
2
女
Ciuq ngoenz ceij gwn ciet
Neix nauhyied dangq maz
Densi daiz hwnj ma
Gohdaiz ca cungdenj
脚
Riengz seizseiq cauzliuz
Raeuz dox iu daeuj lieb
Bibi gwn ngoenz doeg
Hek gokgok daeuj ra
3
男
Vah haujyet ciengz yenz
Dwg yinz gan fuk heiq
Caez gwn diemz gangj feih
Neix batceih cang baenz
脚
Ciuq naeuz seiq riengz seiq
Daengq daengz heij cingh nienz
Bouxboux cungj vuenheij
Saed uz beij vwnamingz
4
女
Raeuz yamq din haeuj daeuj
Da gouj saed vwnzmingz
Mbanj minjveij gvansim
Saed cungsimgz roxlaex
脚
Youq maeuqneix gohdaiz
Miz hauj lai busou
Riengz seizseiq bae byaij
Cij maij mai goengbingz
5
男
Rox aen daemz neix gvangq
Caez daeuj langh bit lwnz
Gej hoz roeg daih gwn
Caj dangz bwn haemq wenq
脚
Mbouj lwnh gaenh dem gyae
Gwn imq caez gangj angq
Daeuj sam baengz haj youx
Caemh caez gouj aen mbwn
6
女
Ngoenz cibnyied cibsam
Hai gohcangz veingi
Daengz cibgouj rawz niz
Daengq daeuj bij ngeih ciengz
脚
Gingdoengh daengz goh vaih
Vunz byaij seiq bien bangz
Senqhuj caiq doxbungz
Cingj gag vunz dingqnyi
7
男
Cingq youz mbongj daemz loet
Cingj canghroeg mbanj loz
Daengq gag vunz daeuj ro
Cungj mumh yoz yaen
脚
Cwnjbi vangx lien dou
Caemh mbouj you fwn doek
Daiq ginghhiz cungj rib
Siengj gij nip yaeuh hoz
8
Bi neix siengj canh cienz
Daeuj humx gojyienz laet
Va nganx de gaenq ok
Yaek caj sok maxlaeuz
脚
Daengq vunz raeuz gaej ngaiz
Bi neix aiq fungnien
Sim ndei gaep sim ndei
Raeuz hengz seiz mbouj yot
9
男
Ndaem ndaej di byaek geq
Caih mou meh haeuj suen
Dangh maeuz dungzx de luenz
Maj ing ciengz cij youq
脚
Go de loet caiq hung
Aiq caih mwngz guenj deq
Caj goeng cawj mbouj youq
Menh donj dawq diuz rieng
10
女
Doengh gij lwg gai cangz
De yej manz dwk gvenq
Gyoengq raeuz yaek naih emq
Mbouj hawj henx giujdin
脚
Yaek ndaej rox mbouj ndaej
Byouq mbuk daeh goengan
Gyoengq raeuz gaej yungh lau
Daengq goengau gaej hemq
11
男
Diegbya ok funghvuengz
Miz gyanghcanh haenzrouh
Youq geuj bi neix daeuj
Caemh gwn haeux haz
脚
Ging naeuz ndaej did fwed
Cix mbin dieg haemq sang
De youq gwnz dingj bya
Hauj gwx maz ndei gouj
12
女
Daeuj gai raeuz roen gyae
Dungx iek gyaez gwn faenj
Henz daiz hauj lai daengq
Daengz gou naengh mbouj caengz
脚
Bonj laiz baet fwngz hoengq
Caemh daengz gyoengq daih caez
Gaiqgaiq aeu hab hoz
Yawj cangh doz byouq naenj
13
男
Vangzdangz ciengx vaiz hung
Daeuj bungq lwnz nazbaq
Dangq caen gwxeaix la
Lij miz gyaj haeux san
脚
Ndaej cuengq lwnz dox roeb
Duzduz gok cungj humz
Langh youq neix doengh naz
Yaep mwngz ga cungj caq
14
Caemh dangq vunz gwn byaek
Gaiqlanz saep sisi
Loengh seng soemj mbouj miz
Bya noh biz dingj daiq
脚
Ningz hoj ndaem go mungz
lij miz vunz bae nyaeb
Hauh caiq naeuz soengq laeuj
Cungj aiq haeuj boihseiz baeqciz baeqciz
15
男
Gou cimz hauj lai daenj
Rox maenqmaenq cungj hauz
Laizyouz youq bauhgyauz
Dwk lauz gwn ndaej feih
脚
Mwnqmwnq ream cungj saw
Rox gizlawz lai maenh
Dang faenj liux seuset
Yaep daiq deb cungj bauz
16
女
Iem bit dem iem gaeq
Aiq mbouj ndaej dox doengz
Yaep mwngz mbouj menh mbon
Ngaenz it maenz mbouj hawj
脚
Gaej yungh vax ci veh
Deng duz de ok gyaeq
Lwg ra mbouj maenh yawj
Aiq boux cawj de coem
17
男
Gangj daengz hong dajdaeuq
Riuz saefouh vangzswnz
Da liuq laj liuq gwn
Hab hawj gwn laeuj soenj
脚
Da yienz guh ndaej lai
Ga caebcaix hoj gouj
Bae ngaenz byawz mbouj ndat
Cingh dwk cat beixlungz
18
女
coz neix coz oen sei
Byaij haeuj bae dou vaq
Yaep di yaek ok maj
Daiq dangz vaq cungj beng
脚
Mbouj sinq vunz guenj yoj
Naeng noh bienq fan geiz
Youq henz suen baenz cumh
Daiq noh cungj boihseiz
19
男
Bet nyied seiz em geq
Yienz aiq heh naj rwz
Raeb gyoengq rungh cuengq cwz
Yaep cungj gw daengz gonq
脚
Hauh bae ndoi goj bi
Caemh hojsiz meh baj
20
Doengh cungj neix cangh ranz
Seiqseiz an laux souj
Hawj dawz gok cix mbouj
Vaih ngaenz laeuj ngaenz yien
脚
Yawj mbouj miz bonj saeh
Vingx mbouj ndaej hwnj sang
Seiq fueng mbouj daih gyaeu
Yaek cwng naeuz baenz youq
21
baj bak mwngz ya yaek
Rox cimz byaek cimz rangz
Noh gaeq ma hai dang
Caiq naeuz hamz mbouj feih
脚
Swq louz hwnj rum mae
mbouj miz gaez mdaej nyaeb
Daih hauj lai baengzyoux
Caez cim gouj lwg lan
22
女
Mbangj naeuz rox daj daeuq
Gvak luet houq mbouj baenz
Mbat neix fug mbouj caengz
Ngaenz mbouj daengz mwngz lauh
脚
Hauh ok bae baij haw
Yaek boux rawz bae gouj
Dangh siengj gya mwngz fouq
Yaek lai bouj cingsaenz
23
男
meh neix sim dingj gyaeu
Son maxlaeuz binz faex
Heiq lau hwnj mbouj ndaej
Hemq bouxdoih ra lae
脚
Soj miz gwnz go mak
Caengz ndwen bat laebcou
Cungj gwn bae hauj lai
Lij suenq gai rawz doih
24
女
Mangj gaezciengh naeuz gvai
Sae cungj ngaiz yaek sax
Cungj naeuz ak lai la
Mbangj baez max bungqgaw
脚
Yaek ndaej rox mbouj ndaej
Bonj saeh yienz loq lai
Hauh doengh gyoengq bincou
Lij sam daeuz gangj gya
25
男
Geij bi rongfaengx bengz
Mbouj aeu denz ma rumq
Dangh soengq saenzcingz unq
Menh bae rungh ciq byiz
脚
Mbangj caemh miz cawjeiq
Aeu ronggyoij ma nem
26
女
Mangj naeuz ok lauxsae
Mbouj bonz naez cumcum
Sawqmwh diuz mingh yinh
Maj rap bwnh haex vaiz
脚
Gou gangj hix naengz gangj
Daengq yaek ngeix haemq gae
Dingq nyi vunz gangj naeuz
Saed miz mouz miz yungj
27
男
Gou senj ngoenz aeu bawx
Caemh deng dah rungh bwnz
Bonjlaiz mbouj baenz hong
Gij ninz ngoenz leihhaih
脚
Gou yienz mbouj siengj aeu
De cungj naeuz yaek haq
Bonjlaiz gag naj couj
Vunz gouj cungj hoj ngoenz
28
女
Heij canghdoz gaj mou
Lumj gou cungj mbouj hanh
Saejsaeq saed naek caengh
Mwngz daj raemx bae gouj
脚
Byaij sicangz bae gouj
Mboujmiz boux law aeu
Ndadaiz baij hangz haw
Noix boux law mbouj haenq
29
男
Hauh dang seiz dungx iek
Dumq biek daeuj dingj gaz
Saek boux ek haeuj ma
Goj caem ra haeuxcid
脚
Ra gaiq gwn mbouj raen
Supgij de haenz cungj sup
Gag mwnq gag hab eiq
Mangj aiq ngeix namzgva
30
女
Naz gaiq gwnz gaiq laj
Mbangj miz gyaj mbouj ndaem
Reih ngamq miz saek faen
Aiq ndaem vaeng gaenx gaemx
脚
Hauh ok bae baij haw
Yaek boux lawz bae gah
Heij canglimz di rog
Caemh saemh goek aeu rag
31
男
Miz di fagfouj fwngz
Caengj sawq daw bae rimq
Dangh naeuz lai haemq lingh
Yienz fuengbienh meh ranz
脚
Dangq sawq bae ndeu yawj
Dox laizlawh guh cawz
Yawj gaiq yiengh yienz baenz
Mbouj gvaq gaenz loq dinj
32
女
Yungh laeuj hoih daih daeuz
Deih fueng raeuz loq gvenq
Daiqda miz lai lengq
Caemh hab caengq neb caez
脚
Aenvih raeuz dox dep
Caengj caemh let bae naeuz
Beix nuengx raeuz lai nga
Ndaej caez gya gaem cenj
33
男
daeuz youz caq ok daeuj
Daengz song souj ngaiz ciz
Dangh lai ndaej saek di
Gwn geij bi mbouj liux
脚
Vih mbangj rengz loq sih
Camq youhsiz gaenq mbouj
Aiq gingz dwk hanh rih
Miz youzsij mbouj miz
34
女
Cangh diet diz gvak ngaem
Caiq haeuq gaenz loq enj
Mbouj naeuz mbouj ndei emq
Dawz gvenq cungj dwg baenz
脚
Hauh naeuz yaek haenj baenz
Ndwn bangx lingq caemh baenz
Gou bak let baez un
Raen dieg vunq aiq gvenq
35
男
Heij boux cuengh san loz
Yawj caemh roz dangq riep
Ruk bumh laep dwk lieb
Mbouj yungj diep youz daeng
脚
Hauh dawz ma cang haeux
Caemh lumj mbouj fuzhoz
De dauq miz ngaenz hung
Hauj lai vunz caemh yiep
36
女
Hauh guh ranz loq iq
Sizci mbouj daih baenz
Mbouj dwg dieg laenzcaenz
Boux de ngaenz mbouj gaeuq
脚
De cungj gag gunnanz
Heij cenz ndang hanhrih
Yienz coengmingz sw cot
Gaej dawz ok raeblaeng
37
男
Mbangj boux houx hong gik guh
Siengj dawz lwg bienh ngeiz
Yaek miz maz hoj ndei
Caemh buh hoiz haedhaed
脚
Ok rog vunz yawj raen
De muenx ndang cungj uq
Mwngz naeuz dwg mbouj dwg
Lumj haeuxcid guh ceiz
38
女
Rap byaek raeuz daeuj gai
Hangz gai byawz gvuenj beij
Seiqseiz yawj heu oiq
Cawj dwk noixdi lauz
脚
Gwx gou gai dwk gvenq
Maenz ngaenz gengq ndaej lai
Haeuj lai vunz daeuj cam
It maenz sam gak seiq
39
男
Yaeb ndaej gyang swx sae
Raemx gyaux naez dwk cimq
Hauh naeuz dwg nem linx
Baez neix yienq mbouj caengz
脚
Vingz cik mbouj raen gvaq
Youq ndaw dah hoz gyaez
Vunz yawj saed mbouj baenz
Youh vaih ngaenz gou lingx
40
女
dangh binhyangz huq ndei
Vaiq dawz bae vaiq baij
Fouxyienz ok canghaij
Mwngz cuengq ai feiqdiet
脚
Namzningz gangdiet cangj
Gaej yungh gangj boihseiz
Siengj aeu sang gyaqcienz
Vunz gojyienz gizgvaiq
重唱
Neix baenz raenz raeuh funghdungz
Ce noix rumz vaiq daj
Yaep cingz mbouj ndaej maj
Cix mbouj gag laq ngawz
脚
Seiqseiz meh cungj daengq
Mbouj yungh daengj vunzgwn
Daeuj saek di ngoenz gai
Cungj aiq ngaiz dwg ndaq
41
男
Duz neix max rae daeg
Mwngz haengj yaek rawne
Rox he mbouj rox he
Yaep cingz de doq dik
脚
Yaep cingz hai song daez
Doq deng gaez naj gvaiq
Cik ga byaij cungj gvez
42
女
Daeuj gai vunz loq yaed
Cungj miz daeg lauh caiz
Lauxbanj ngaenz soed lai
Yaek wnggai gag ndomq
脚
Hauh mbouj dingq gou naeuz
Gwn caeuz mbouj miz byaek
43
男
Doengh seiq neix di mbwn
Miz vunz mbouj laux saed
Gvuenj byaw da mbouj raed
Yaep di raep cungj gon
脚
Ging doengh boux damj cuk
Yaep cungj mbuk daeh gwnz
Hwnz daengz ninz mbouj you
Ngangz hai dou caj caeg
44
女
Haq guh bawx goeng neix
Gyadaej mbouj gunnanz
Dah sam daeg caiq sam
Heuh han dox doeng hw
脚
Yawj mbauq yienz loq gyaeu
Mbouj suenq naeuz bonj saeh
Mbouj gangj mwngz cungj rox
Vih caiq dox gaenh ranz
45
男
Cietciet cungj guh ceiz
Faen haemq nei ndaej mbouj
Cingh dam doz ndaej ouq
Hawj vunz gouj mbouj gyaeu
脚
Yaek haeuj sim dwk naenj
Hab gaenx haemq baenz soi
Dangh bouxboux mbouj cimz
Youh vaih cienz cawx haeux
46
女
Cingh rox vunz sou mak
Cix daeuj dou suen
Boux cawj langx aen luenz
Genj aen mbieng cij ndenq
脚
Yaep naeuz cij baenz naeuz
Gyoengq maxlaeuz mbei fag
Ngoenz neix daw bae gai
Yaek ndei gai cij suenq
47
男
Raen ndaw cawz faen byaek
Haw raeuz gaep meh daiq
Doiq mbouj hwnj vunz lai
Donq haeux ngaiz ndeu hoengh
脚
Daih iek raeuz cij gwn
Gaiq law hung menh yaeb
48
女
Yawj ngoenz cij haq lan
Gyaq cang raeuz cungj daeuq
Daengq moegciengh baenz rouh
Cungj mij boux lawz baenz
脚
Mij caengz rawz giva
Heij simj baj sim fanz
Saeq cingz saeq mbouj gyaeu
Yaek cwng naeuz baenz youq
49
男
Lwnz vaiz daih gya guenj
Daengz gou ciengx saek ngoenz
Miz duz ndeu ceiq aeng
Gou youq haenz ndwi onj
脚
Youzyaz gaej yungh yiem
Byawz miz cienz guenj buenq
Dangh duz law haemq fat
Menh aeu cag cwn ndaeng
50
女
Suenq gyau doih max douz
Nginh raeuz caen cwt cwt
Hawj boux duk boux duk
Miz haeuxcid lai rawz
脚
Gaenq gaxgonq gangj gvaq
Mwngz cingq gyaq rox naeuz
Cizbyimj daiq ma cang
Ma faen lan dem lwq
51
男
Bouxboux muengh fat caiz
Gou daj dai onq laeuj
Doh soq de hix gaeuq
Bau baengzyoux naj hoengz
脚
Haeux senqsenq cix oemq
Siengj haet haemh donq ngaiz
Miz max raeuz gvuenj cai
Byaek gwnz daiz baenz raeuh
52
女
Fouj senq bak mbouj raeh
Cij daeuj deih hai loz
Neix faex limz gaengq gyo
Ngoenz maz go ndaej raek
脚
Gangj cien ak fan ak
Mwnq lawz hag goeng sae
Cingq aen leix daeuj lwnh
Cix gaej yungh damdoz
53
男
Duz meuz neix iek gyauj
Cauj lauz rang ving ving
Dangh yaepcingz gwn inq
Aiq doek ringj hoj naeuz
脚
Gou senqsenq cix deq
Muengh dahcej hai daeng
Miz cienz youq ndaw fawz
Menh ok haw bae cimh
54
女
Go mak mbouj cingz suz
Gaej gaenj gw naeuz feih
Gangj yaek sinq rawz doih
De caemh heiq hoj gai
脚
Gaet gaemzgaemz cix saep
Gou bangh naep bwn rwz
Dangh gyaq mbouj ndaej sang
Gaemh hoj han maenz laeh raen
55
男
Mat neix ngauq yinhvei
Aeu diusuij ma naeuz
Diuz neix mbouj youh raeuz
Gim baiz aeu geij bienq
脚
Mbangj cix ngaenz daih lw
Caiq ndaej gw noh gaeq
Mbouj gangj vunz caemh rox
Gaiq cingj go digiuz
56
女
Neix vunz meh gaem cae
Daengq vaizrae gaej gaenj
Dingh noglaez cwnj gaenj
Goengreng maenh gvuenj gaenj
脚
Vih son mbouj caengz sug
Cij baez fug goengsae
Vih caiq langx maenz ngaenz
Seiq bien haenz coek caenq
57
男
Ma gutgungq dwk ninz
Gaej yungh din dik gouj
Dangh naeuz haeb di haeuh
Cawj gya mbouj fucwz
脚
Yaep mwngz gag goengz naek
Heiq lau haeb giujdin
Haeuj ok yaek gag he
Gaej naeuz de mbouj rouq
58
女
Caj raeuz daengq gag bux boux
Bauq hozbuj loq rem
Ngauqngauq hungj lumjgeni
Aiq yaek gyemz dangz munzh
脚
Sing beij sing yiengj hung
Hawj vunz diuq ruru
Daengq raeuz neix gag boux
Gaej yungh daeuj luenh beng
口承文芸 