1
美
Faenh gou cinzcimeij.
Mouj doengz doih doengz gywnz.
Seng daeuj cix gya gungz.
Baenz seiqvunz sunhoj.
2
連
Yanghlenz ngvanh dauq laeng.
Gag cibfaen gikheiq.
Bohmeh dai gvaq seiq.
Lwggyax coiq siliengz.
3
美
Laep haeuj cix laep ok.
Youqyouq doek raemxda.
Gaiq reih mouj gaiq naz.
Yaek ngoenzmaz gvaq seiq.
4
連
Dem mwngz cinz cimeij.
Youq mwnqneix doxyangz.
Miz gawqvah siengj cam.
Saed hoj nanz haibak.
美
5
Faenhgou gangj lumj neix.
Gou gag ngeix mbouj han.
Maih hai bak zix nanz
Cungj wnghdangh baez gangj.
6
連
Song boux raeuz di cung.
Caez seiqvunz vijsij.
Dungziq mbouj dungz iq.
Hab itgij saenghhoz.
7
美
Gou fuzgya fuzdangq.
Ngoenzngoenz cangh gai liu.
Dahmwngz sau miuzdiuz
Vunz mbouj riu mwngz haz.
8
連
Cingh aeu miz ceiqheiq.
Mouj lau doih ndaej riu.
Diuzgienh mbouj gyangzgyaeuz
Liu gou cungj haeungj.
9.
美
Guh vunz mbouj lumj vunz.
Suenq gou gungz ndaej caenh.
Ra gwn mbouj raen daenj.
Mwngz mbouj ienq hij rawz
10
連
Vunz lij suenq fat caiz
Heiq baenzlai maz do.
Dinfwngz cauh ok mboq.
Daiq sinhoj mbouj lau.
11
美
Danghnaeuz mwngz miz sim.
Gou mizcingzi miz eiq.
Sueng raeuz caez vuenheij.
Gaep baenzseiq gvanbaz.
12
連
Rouz swqyouz lenqaiq.
Gwn byaek ngaih cungj diemz.
Canghhij giet liengzyenz.
Muengh bwznienz gaihngouj.
13
美
Gou dem mwngz ma gangj.
Saed ngamjbanj lunaz.
Ngoenzngoenz cungj hwnj bya.
Vi aen gya daj suenq.
14
連
Daengz laep menh haeuj ranz.
Ngoenz geij ban cungj daeh.
Gai li cwk gya saeh.
Guh mbouj ndaej bae raw.
15
美
Ndaej doxbaengh guhvunz.
Raeuz simyungz vuen heij.
Caez hwnj bya roengz deih.
Cungj mbouj ngeix dwg rengz.
16
連
Caez miz sim miz eiq.
Gaiq vuenheij wng dang.
Gwnz bya miz liu sang.
Raemj saek can ndaej rap.
17
美
Raeuz mbouj lau sinhoj.
Byaij it loh roen rin.
Daengz laj bya dieg bingz.
Menh yiet din coj ndaej.
18
連
De aiq dam dawz naek.
Faexhanz raek do dem.
Cungj mbouj raen ma daengz.
Caengj dauqlaeng bae yawj.
19
美
Ranz yaek raek sizsiz.
Aiq naek di bae laeuj.
Caeklaiq mwngz hwnjdaeuj.
Ndaej bang couq dawzma.
20
連
Gou cungj caeuq mwngz baeg.
Dam baenz naek do maz.
Maih cienz gaenj lu maz.
Gou vunz baz hojsik.
21
美
Couheiq yienz loq baeg.
Mbouj suenq naek lai rawz.
Miz lai cungj siengj dawz.
Rap daengz haw cix dij.
22
連
Yienz naeuz rengz vunz sai.
Goq caiz caiq goq mingh.
Hauh naeuz ndang haeujbingh.
Caiq hoj cimh ngaenz yw.
23
美
Laj iq cix benz bya.
Lienh dwk ga cungj ginq
Ngoenz ngoenz cungj daengz dingj.
Ndaej ok bingh bae rawz.
24
連
Dawz rap di saeh soq.
Cauhgoq caemh mbouj deng.
Yienz rox mbouj dwg rengz
Vaih hwet gyeng cix hoj.
25
美
Rop cau goq bae laeuj.
Hawj mwngz couq sim senz.
Baez neix mbouj cengq rengz.
Gangj ndaej deng couh dingq.
26
連
Vih ngoenzngoenz cungj daeuj.
Gaej guh boux dam caiz.
Ciuq dauh leix ma baiz.
Mwngz vunz sai caemh rox.
27
美
Gai liu vuenh haeux gwn.
Saed doiq vunz mbouj gvaq.
Nanzvih faenh mwngz ga.
Couq saet naj dawz gwnz.
28
連
Caez ngamj banj sizsiz.
Gou mboujmiz ienq danq.
Vih cwk cauh gya dangq.
Cungj gaen hangx mwngz bae.
29
美
Yamq din ma laeng gou.
Neix gya raeuz fuz yiengh.
Ra gaiq mbouj raen gyienh.
Aiq caeg ienq lajhoz.
30
連
Gou yamq din haeuj ma.
Guh gvan baz mbouj ienq.
Cungj gag sim yinxyienh.
Yaek caeg ienq gijmaz.
31
美
Ndaw singz ok bugau.
Hauqcauh gauj gungh mingz.
Hauh gou sawq ndaej lingz.
Bae daengz ging banh saeh.
32
連
Lohlez cungq cangh yienz.
Yungz cien nienz fanh daih.
Riengz bae guh daiq daiq.
Doengz caez byaij youz gai.
33
美
Baez de yungz fouzbeij.
Dqg dauhleix wngdang.
Mwngz dawz souj diz lamz.
Daihcaez ram boux mbiengj.
34
連
Ndaej lumj neix cix ndei.
Lau mizseiz gangj byou.
Vit gwxgou gag youq.
Dangq gaepfouj nazfwz.
35
美
Song boux coiq dox ngamj.
Mbouj dwg gang haw hingz.
Gou yawj saw caengz dingz.
Mwngz gag ninz gag gonq.
36
連
Mwngz yoj saw gauj ging.
Gou aen sim caemh muengh.
Lij daemj rok dwg buenh.
Cungj mbouj siengj sien ninz.
37
美
Aen ndwen hix rongh ngvangj.
Ngoenzneix ganj daengz ging.
Siengj gauj hwnj goeng mingz
Couh hai din lu bw.
38
連
Doengh ngoenzneix saedceij.
Saeq ngeix saeq sim gam.
Caengj gou caemh cang ndang.
Songq boux gvan daeuz gauj.
39
美
Doenghduz roeg ying niuj.
Heuh gyiujgyiuj geij sing
Lumj naeuz mwngz soengqhingz
Gouq miz cingz miz eiq.
連
40
Dangh naeuz miz fuk heiq.
Ndaej naengh oij ciuz cung.
Bae de mwngz hwnj hung.
Goej yungh lumz lwgyah.
41
美
Gou gangj cix ciuq sim.
Laj diendingz senhsiq.
Mouj vangz ngaenh fuhi.
Yez cih sij hawj mwngz.
42
連
Raengq mwngz guh lauxsaed.
Gaij luenj mbaet mauh dan.
Go gizvah ndaw ran.
Heiq lij rang dwendwen.
43
美
Mbwn gvaqfwj baek bien.
Fwn swhyienz cungj daeuj.
Daengz gouj yied seiz houh.
Caiq hab bouh hai va.
44
連
Meix bi miz seiq geiq.
Cix caemh heiq doeng gan.
Ngaiz rengx gvaq daih hanz.
Go va nan ndaej did.
45
美
Yamq din ok bak dou.
Ndaej lumz bae la.
Riebgebq daebgz seuz hah.
Caeng lij gvax ma rong.
46
連
Baenxbaenx cungj gingj diz.
Fuengz saek di caeg haeuj.
Gag vunz gag sunhsouj.
Dox aiqyouh mbouj baenz.
47
美
Gou ok bae caemh ngeix.
Lij diuz neix veiz nanz.
Hoeng rog caiq hong ranz.
Mij vunz bang mwngz leix.
48
連
Caenh aeu mwngz gauj cungq.
Cix mbouj yungh sim fanz.
Gaujsiq sim saiq cangz.
Gaej ngvan sam dauq seiq.
49
美
Bak goj baenz de naeuz.
Aen sim gou mbouj sij.
Miz it namz it nij.
Vit lwg iq hawj mwngz.
50
連
Gou bau cingj leix ndei.
Mwngz goj bae yienz dingh.
Miz bingh couh yw bingh.
Gou baujcingq guh daengz.
51
美
Gangj yienghyiengh couhcingz.
Mwngz vuensim dingh youq.
Gou bae nanz di haeuh.
Heuh mwngz daeuj guh caemz.
52
連
Mwngz ok bae yozciz.
Song sam bi di naih.
Daeuj cimh mwngz gwz raix.
Yaek sezdaiq coh baenz.
53
美
Gou dem mwngz di cingz.
Mbouj gyaj sim dox daih.
Aenhcingz laeg baenz haij.
Bau caudaih coucenz.
54
連
Mwngz goj baenx de naeuz.
Gangj aeu goj yung heih.
Hauh gauj hwnj rawz daex.
Lau mbouj ngeix daengz raeuz.
55
美
Sueng raeuz gag yawj dij.
Cungj mbouj sij diem din.
Hauh gauj hwnj goeng mingz.
Hawj lienh gim mwngz venj.
56
連
Bak mwngz dingj ak cang.
Cej samsam caiq seiq.
Duz roeg youq gwnz faex.
Cungj youh ndaej roengz ma.
57
美
Gou bae daengz ging singz.
Mwngz aen sim nanz goq.
Dunghmeiq caeuq cwnhgoh.
Conq loxlox henzndang.
58
連
Raeuz mbouj dwg dox sawq.
Vah gawqgawq hix ndei.
Raen naj yaek geij seiz.
Yaek goen bae cix hoj.
59
美
Gou caeuq mwngz gyau cingz.
Ciengzseiz sim cungj siengj.
Bae saek ngoenz fueng bienh.
Menh sij saenq ma ranz.
60
連
Gimhgaiqcij gwnz fawz.
Yaek dawz dwg maz yiengh.
Mwngz dawz cauj ruenh.
Couh gaep ciengx hojciz.
61
美
Soengq hawj haed fwngz gim.
Suenq miz cingz lai laeuj.
Sijsaeq ngvanh hwnj daeuj.
Mij saek boux baenz ndei.
62
連
Caenh cingj mbouj caenh cingz.
Youq aen sim mwngz laeuj.
Mwngz ok bae di haeuh.
Lau miz boux gengq ndei.
63
美
Yaek gyouq ndaej lumj mwngz.
Daiq haed fwngz cungj geij.
Vunz ndei dangq bit bae.
Gou mbouj yex haeuj bae.
64
連
Daihcaeux cix hai din.
Lupcingz geij cib bouq.
Gaihfungh daeng ha laeuj.
Raeuz uzcouj faen liz.
65
美
Daeuj daengz Gaihfungh fuj.
Sij saeq nguh mbouj nanz.
Gou hingqsiq foihcangz.
Couh haeuh cangz gaujsiq.
66
連
Faenh gou ma daengz ranz.
Caemh ngeix sam douq seiq.
Ciqmeij hax ciqmeij.
Aiq mbouj noix goeng mingz.
67
美
Geij cibdiuz daez mogh.
Dap mbouj loek saek di.
Gou yawj miz naengz liz.
Gauj hwnj bi neix laeuj.
68
連
Gou cimej gauj cungq.
Cungj ungqdungq muenq singz.
Laj mbanj caemh riuz mingz.
Ndaej houj ging banh saeh.
69
美
Lozguj caeuq yangzhauq.
Cuengq sam bauq doengh dien.
Gauj hwnj cungq canghyienz.
Raeuz yienjgyien yangj couq.
70
連
Cimeij ok mingz daeuz.
Gou mbouj you mbouj heiq.
Gaiq yingyungz fouzbeij.
Vuen heij leix hoeng ranz.
71
美
Ngoenz gvaq ngoen yietyiet.
Ciet gvaq ciet linzlinq.
Dax gunghcij coengmingz.
Doengh daengz sim sadsad.
72
宮主
Seiq vunz gou gungh cij.
Gag yienqiq sungzsungz.
Nanz ok rog raen vunz.
Cingh raeb mwng cimeij.
73
美
Dax mwngz sau gig ndei.
Gou ciengzseiz haeb haenh.
Hauh mwngz hanj mbouj hanj.
Gou yienz maengz ndaw sim.
74
宮主
Gunghcij cam coenz ndei.
Cien geiz mbouj gangj gyaj.
Dangh ndaw ranz miz yah.
Gaij caiq caj dax gou.
75
美
Gou caen mbouj caengz miz.
Mwngz vaizngiz do mbouq.
Guenj diucaz yawj gouj.
Yaek dox youh gijmaz.
76
宮主
Guenj mwngz byouq guh ndei.
Ceij bau feiz cungj louh.
Miz saeh cingz ok daeuj.
Mwngz gvaq houh gag dang.
77
美
Gaij ngiz sam caiq seiq.
Baengh mbouj heiq mbouj you.
Bauhgungh ndaej daiz raeuz.
Couh miz daeuz miz vaej.
78
宮主
Gangj daengz cix guh daengz.
Gou baenzbaenz cungj haq.
Gaiq fung mwngz fumaj.
Byaij dienyah vwnzmingz.
79
美
Gunghcij mbouj miz maz.
Couh bae ma dunghgoq.
Buxbux yaek caez rox.
Cam daxboh yawj dem.
80
宮主
Haemhlenz ma daengz ranz.
Gou gengq cam de gouj.
Dem gwxmwngz boiqngouj.
De ngvaek gyaeuj dazfuz.
81
美
Dangh de ndaej gaihgouj.
Couh song boux cingzcenz.
Ndaej gyiethiq liengz yienz.
Yungz cien nienz fanh daih.
82
宮主
Mwngz cangqyienz hwnj hung.
Saed yingyungz mbouj gvaq.
Caiq fung mwngz fuqmaj.
Guenj dienyaq yinz minz.
83
美
Ndaej naengh vangz ciuzdaih.
Guenj cigyai vwnzmingz.
Leix saeh ndaw cauz dingz.
Ndaej riuz mingz sw haij.
84
連
Gouh yanghlenz youq mnz.
Dingz nanz mbouj raen naj.
Ngeix gaiq gyaez de gax.
Caengj baez gvax emq de.
85
?子
Faenh gou heuh cwnhgou.
Gyaez dax box dangq maz.
Nanz nanz cungj mbouj ma.
Raeuz dox daz bae yawj.
86
連
Lwg dwg dax cungj miz.
Hix geij bi daengz haemh.
Siengj daeuj hoz caemh haenq.
Daiq lienz saenq mbouj doeng.
87
?
Geij meh lwg dox gaen.
Sawq mwh daengz menq neix.
Yaek dungh goq monz vaeq.
Mbouj naengz ndaej luenh con.
88
連
Yamq din daengz mwnq neix.
Cam monz vaeq bak dou.
Haeh cimeij daeuj raeuz.
Dem dwxgou raen naj.
89
?
Souj monz vaeq giz neix.
Dwg cimeij faenh anh.
Fuqmaj di gungh dangz.
Mwngz yaek cam maz saeh.
90
連
Gou daeuj daengz mwnqneix.
Dwg cimeij gvan baz.
Daj lajmbanj daeuj caz.
Vih gwxmaz mbouj ndaej.
91
？
Da sang lumj youh saeq.
Byouq youj saeh daiq gyong.
Mouq neix dwg yaz moenz.
Mwng luenh con mbouj ndaejj.
92
連
Yaz moenz mbouj luenh byaij.
Caemh mbouj gvaiq mwng cam.
Cimeij di vunz ran
Mij wnghdangh ha la.
93
?
Sam mehlwg na
Byouq doxdaz daeuj nei.
Ra goeng cincimeij
Cwjeiq dwg do maz.
94
連
Cimeij youq mbouj youq.
Cingj bang couq bae caz.
Gangj bae caiq gangj ma.
Gou vunz baz de laeu.
95
?
Dingq ngi mwngz soj gangj.
Hawj gou nanq mbouj lingz.
Caiq miz boux fuh yimz.
Lau ndaw ging miz luenh.
96
連
Maj dingh dingh baugau.
Mbouj cauj nauj muenxdingz.
Moenz vaeq caemh ciuq sim.
Gou cib cingz gangj se.
97
?
Boux de ndei ha ndei.
Mij saek saez raen gvaq.
Bauq gauq cinz fu maj.
Laj mbanj yah daeuj caz.
98
連
Daiq haeux mbouj baen gwn.
Gyang hwnz fangzhwnzloq.
Lwg nanz mbouj raen boh.
Daiq daeuj yoj baez ndaeu.
99
美
Youq seizneix cizgyenh.
Yawj seiq lengq mij vunz.
Caegcaeg daeuj raen mwngz.
Gaej yungh un saeh gaeuq.
100
連
Ndaq ranz me ngamq dai.
Gengq hoiz caiz de laeuj.
Dawz diuz sai hauq daeuj.
Hawj mwngz gouj baez ndeu.
101
美
Dwg faenh gou di saeh.
Mwngz caiq gaej luenh caz.
Gwx maz couh gwx maz.
Maj gvuenj naz gvuenj reih.
102
連
Gvan baz baenz buenq seiq.
Daeuj daengz neix lunaz.
Yaek hoz yaek gwxmaz.
Luenh laep ra dwk ndaq.
103
美
Daeuj daengz neix bak singz.
Gangj saed sim di vah.
Faen ngaenz mwng couj maj.
Gaej ginz gvax baenz lai.
104
連
Gou soengq mwngz boeg saw.
Couh suenq ngawz bae la.
Hwnj hung mbouj nginh ya.
Mwngz gag lax liengz sim.
105
美
Ra fwnz ngoz dem ngoz.
Geiq ndaw hoz ndaw dungx.
Gaiq nanz raeuz gvaq bywngj.
Mwngz gaej yungh gawq deu.
106
連
Ngoenz diuq la diuq gwnz.
Gwn cix gwn mbouj imq.
Daeuj daengz gvan mbouj nginh.
Sieng haeh linx dai maez.
107
美
Gag ciengx lwg dwk hung.
Caemh dwg mwngz di laeuj.
Vaiq rox singj hwnj daeuj.
Meh song boux caez damz.
108
連
Gou siengj saed sim cau.
Goenglauz fuz cung yungh.
Saeq ngeix saeq sim gunj.
Ngeix dwg unq din fwngz.
109
美
Daengz ngoenz neix di cung.
Saed doiq mwngz mbouj gvaq.
Cuk yienz siengj lwg yah.
Bae naj hoj vaez daeuz.
110
連
Geij bak leix roen gyae.
Siengj daeuj baez raen naj.
Bouq naeuz doiq mbouj gvaq.
Lij nginh yah dem rawz.
111
美
Gou gag byaij haeuh laeg.
Cix gangz naek sim daeuz.
Aeu mwngz mbouj ndaej gou.
Hoeng yaek naeuz cix hoj.
112
連
Gangj caen rox gangj gyaj.
Haw boux yah sim fanz.
Miz gaiqmaz gungq nanz.
Gou menh bang mwngz gej.
113
美
Gangj yiengh neix di cung.
Saed doiq mwngz mbouj gvaq.
Gaenq lingx cingz fumaj.
Bae naj mbouj veiz daeuz.
114
連
Cimeij ha cimeij .
Vuengjfeiq mwngz henj hung.
Byouq guh yiengh neix vunz.
Faemq fwk lum lwgya.
115
美
Gou gag byaij loneg roen.
Caemh gag honz mbouj gvaq.
Hauh naeuz yaek nginh yah.
Cix fumaj nan dang.
116
連
Cwnhgoh caeuq dunghmeiq.
Gvih dwg daej ngimh mwngz.
Byouq guh yiengh neix vunz.
Doiq ndaej mbwn halaq.
117
美
Mbouj caiq gangj baenz lai
Gou bonjlaiz caemh siengj.
Hawj ngaenz sam bal liengx.
Dawz ma guenj reih naz.
118
連
Doengh yiengh neix lieng sim.
Gou lingxcingz fuz yungh.
Doiq hawj mwngz soed rumq.
Maj ciengx gungh sim niengz.
119
美
Fumaj cix naengz dang.
Caemh gannanz hojgej.
Hawj cix aeu lune.
Yaek mbouj ne gijmaz.
120
連
Ganbaz buenq byongh gyang.
Gij gan nanz fuzbeij.
Aeu ngaenz ma daiq leih.
Gaiq sieng heiq mbouj lumz.
121
美
Saeh cingz cix haeuj gai.
Gag bwh dai daj sueuq.
Byouq yiengh couh byougyiengh.
Anq mbouj suenq guh vunz.
122
連
Gu gvan baz buenqseiq.
Byaeuq yungzheih baenzlaih.
Naengz haeh mbouj naengz haiz.
Yoj mwngz gvai baenz youq.
123
美
Gaemjgyienz com haeuj faz.
Raeg dauq ma mbouj ndaej.
Faen ngaenz mwngz soed daeh.
Caj mienx saeh haeuh ndang.
124
連
Siengj lwgsau vuengz daeq.
Byouq heiq saeh haeuj ndang.
Vit lwg yah ndaw ranz.
Vingx caengz raen gvaq daeuj.
125
美
Baij roen loek lu naz.
Gag sim fanz muenhluenh.
Hauh mwngz mbouj yienz liengh.
Aiq dai vuengj cix lai.
126
連
Caemh doiq hoz ndaej gvaq.
Mbouj gag lax sim daeuz.
Aeu yah moq vit raeuz.
Nanq hawj gou yienzliengh.
127
美
Doengh yiengh neix vunz baz.
Yaek miz maz goj yak.
Ngaenz mbouj aeu cix sat.
Din dikdat mwngz deuz.
128
連
Muenz daxgou goeng lauz.
Vit raeu bau ciengx lwg.
Aen sim gou byouq fug.
Bae gauq dwk roengz daiz.
129
官員?
Raeb mwngz sam meh lwg.
Daej bywgbywg gwxmaz.
Gou roengz max ma caz.
Cingj veiz daz ok daeuj.
130
連
Gou dem cubz cimeij.
Gaep buenq seiq gvan baz.
Raeuz daeuj ging baez caz.
Gwn raemx da dwk imq.
131
官
Ciuq mwng gangj di cung.
Luj fangzhwnz do ha.
Ci meij dang fumaj.
Gouj loek yah do rawz.
132
連
De ok daeuj gauj ging.
Vit lwg nding lwg seiq.
Meh ngamq dai yauqneix.
Mbouj bang leix gya ciengz.
133
官
Dingq mwngz gangj di vah.
Caen gyaj hoj faen mingz.
Cimeij hwnj goeng mingz.
Bienq yiengh sim nei la.
134
連
Song boux lwg youq neix.
Cincimeij caen seng.
Mbouj dwg gou yanglenz.
Luenh daeuj ceng guh yah.
135
官
Cam mwngz geij meh lwg.
Dwg mbouj dwg cingq caen.
Luenh gya coih mbouj baenz.
Raeuz dang dien gangj vah.
136
連
Gou gangj cix ciuq sim
Dwg saeh cingz cing dang.
Rauh naeuz gou luenh gangj.
Guenj laj mbouj bae caz.
137
官
Goengq sous am meh lwg.
Gaij yungh yug baenz lai.
Cimeij guenj byouq gvai.
Anbaiz couq mwngz banh.
138
連
Cimeij guh ngoenz seng.
Yanghlenz bae gunghoh.
Gug cug yiengh cug soq.
Rox mbouj rox bienq sim.
139
官
Fumaj guh ngoenz seng.
Cungj vuenz cienz vuen heij.
Mbangj naeuz foux caiceij.
Mbangj doengz eiq heuh fwenh.
140
連
Ciqmwij ndaej hwnj hung.
Saed yingyungz bae naj.
Dax gou bienq gauq vaq.
Lij rox naj dem rawz.
141
美
Cimeij gangj bonj sim.
Saed cingz mbouj maen gvaq.
Mbouj dwg gou di yah.
Byouq miz naj luenh camh.
142
連
Baez coh bae guh gya.
Ranz haz rongh ngiengjngiengj.
Fwn doek mbwn mbouj byiengj.
Caez gang liengj ndaq ran.
143
美
Ngoenz neix guh saengh hiz.
Couh camq ciz daengz neix.
Fuq maj miz goeng saeh.
Mouj caiq ndaej la cangz.
144
連
Cix mbouj dwg vunz ngawz.
Aen sim dawz law cuengq.
Ranz naeuz cix mbouj doengh.
Cix miz muengh bau goeng.
145
美
Hawj ngaenz cix mbouj aeu.
Mouj dwg naeuz saek bienq.
Caiq nauq daeuj daengz dien.
Cungj dauj lenj daeg raeuz.
146
連
Song boux lwg henz ndang.
Heuh boh sam caiq seiq.
Baenx baenx cungj mbouj leix.
Yawj cimeij liengz sim.
147
美
Aeu mwngz mbouj ndaej gou.
Hanz cix naeuz mbouj dingq.
Gou saek ngoenz yaling.
Sam diuz mingh mbouj lw.
148
連
Yaek dai rox yaek lix.
Lau diemqcij maz fanz.
Vaiq diuq ok rog ran.
Neix caiq sam meh lwg.
149
美
Yanghlenz dwg liuz langq.
Gij daq damj gik lai.
Youq haj hauh moenz baiz.
Baij goengcai bae gaj.
150
連
Diuq daengz neix miuh gaeuq.
Lwgiq couj siengj ninz.
Yaek ngvan laep limzlimz.
Baez yiet din ndeu gaenq.
151
?
Gou hanzgiz di ndang.
Yax moenz dang buqyaq.
Gyau hawj gou fag cax.
Bonq bae gaj yanghlenz.
152
連
Cinz cimeij ciqgyaiq.
Dieg deih daih mbouj bingz.
Haeuj miuh gaeuq bae ninz.
Yaek siuj sim cij ndaej.
153
?
Bae siudiemq mbouj raen.
Gya singj cangz caehgouq.
Bonq daengz aen miuh gaeuq.
Mwngz deuz menqlawz dem.
154
連
Mwngz sawq mwh daengz neix.
Hawj gou ngeix dwg vueng.
Lumj ciyau mbouj doengz.
Vunz loengz rox bing lauq.
155
?
Gou cauzdingz di bing.
Daeuj ciz hingz yim mu.
Yaek ra mwng sam bux.
Gij soqnguq gik lai.
156
連
Vih cigyai foek fan.
Gaiq sim fanz fuz beij.
Gou cix famh maz coih.
Daeuj daengz neix ra gou.
157
?
Yanghlenz ingjyangj daih.
Dwg veizhaiq yim minz
Daeuj boek luenh ging singz.
Gou diuq din daeuj gaj.
158
連
Yanghlenz gou bonj yinz.
Dwg liengzminz cih fuq.
Aeu mwng gangj cingsuj.
Gaej cauh hux hawj gou.
159
?
Mwngz famh coih cix lai.
Cimoij baiz cing suj.
Ciz yaq daz yim mu.
Hawj gou boux ciz hingz.
160
香
Mwngz hanzgiz caemh ngawz.
Mij doeg saw rawz gax.
Aeu liengz sim mbouj la.
Aiq douj gaj vunz ndei.
161
?
Mingqlingq yaek fuzsungz.
Lingx ngaenz hoengz roengz daeh.
Gaj vunz dangq gaj gaeq.
Gou saed saeh mbouj lau.
162
連
Meh lwg sam boux vunz.
Gvih doiq mbwn cij gangj.
Mij gaiq maz ca famh.
Dwg yienvuengj.
163
?
Bakbak gangj yienvuengj.
Cingj mwngz gangj faen mingz.
Vih gij maz saeh cingz.
Caj gou bingz yawj gouj.
164
連
Gou caeuq cin cimeij.
Senq gyietboiq yienyienz.
Gangj gaiq saej sienz.
Cix it yienz nanq cinq.
165
?
Cimeij caeu yanghlenz.
Dwg hijsenz di yah.
Miz lwg daeg caiq dax.
Dang fumaj bienq sim.
166
連
Ga dik byou ok ma.
Gwn raemx da guh donq.
Gaiq baij mwngz daeuj bonq.
Ra lengq ndonj mbouj raen.
167
?
Yanghlenz gangj di cingz.
Dwg hojlenz di vah.
Mingqlingq gou douj gaj.
Famh dien yah lij youz.
168
連
Gou baiq dien baiq mbwn.
Yiet gyaeuj mwngz couj gaj.
Gouz mwngz song faen naj.
Louz daegdax hawj gou.
169
?
Mwngz gangj di cing youz.
Din fawz gou cungj unq.
Diuq caz neix ginzcung.
Gou hengz yung mbouj deng.
170
連
Song boux lwg youq neix.
Gvih dwk daej gouz mwngz.
Docih mwngz beix lungz.
Ndaej ywnx coengz de mbou.
171
?
Gwnz ndang gou miz ngaenz.
Menh caiq faen mwngz lwg.
Meh mwngz vunz cingq cwg.
Gou mbouj dwk de dai.
172
連
Deuz gvaq haw gvaq gai.
Souh hauj lai vijsij.
Raeb mwngz ndaej goujdij.
Gou docih mbouj lumz.
173
?
Dawz fagcax roeng ma.
Gag sim maz muenh luenh.
Mbouj yienz gou dai gonq.
Menx yienvuengj yanghlenz.
174
連
Baez conq ndang yaek byek.
Cax gag leg dingj ai.
Hanzgiz dwg ying saiz.
Dauj fanj dai diuz mingh.
175
?
Gouh cwnhgoh youq neix.
Cix gag daej mbouj lumz.
Vih cimeij sim yung.
Coj cix fungz yiengh neix.
176
連
Cungj daihcaez yienvuengj.
Gou yied siengj yied doeng.
Daw cwngqgyienq raen bauhgungh.
Coj faen hoengzdem bag.
177
色
Gou yaek bae cuz caih.
Cungj bonj laiz loq gaenj.
Raen mwngz gvih neix caj.
Cix dwg maz di saeh.
178
連
Cax uq lwed lij hoengz.
Hawj bau goeng yawj gvaq.
Dwg hanzgiz di cax.
Cinz fumaj haij de.
179
色
Mwngz dwg yiengh maz vunz.
Byouq ndaej fungz fuqmaj.
Saeh cingz caen rox gyaj.
Byouq ndaej gaj hanzgiz.
180
連
Yaek saemh goek douq gaen.
Banh saeh daengz goengcingq.
Dangh mwng mbouj siengsin.
Miuh gouq nginh soi haiz.
181
色
Sik haek ma ndaw singz.
Dawz saeh cingz giva.
Heuh goeng cinfumaj.
Daeuj raen naj bauhgungh.
182
連
Gouq yanghlenz dih ndang.
Raeb boux gvan mbouj cingq.
Vit lwgyah mbouj nginh.
Caiq haih mingh hanzgiz.
183
色
Cam mwngz cinz fuqmaj.
Doiq naj simj buenq daiz.
Hanzgiz vih maz dai.
Anbaiz baenz lawz yiengh.
184
連
Gouh yanghlenz gamj cwngq.
Vih sim gunj daiq lai.
Hanzgiz swq cinq dai.
Vit soi haiz ndaw miuh.
185
美
Gou cimeij mbouj dwg.
Hengz sim nduk daiq lai.
Hanzgiz vih gou dai.
Vih an baiz gaj yah.
186
連
Lwgyah daeuj ging caz.
Bonq ok ma mbouj nginh.
Baij hanzgiz bae cimh.
Hawj de mingh mbouj lw.
187
?
Dwg saeh cingz swnz saiq.
Raeuz liuj gaij lu yoz.
Miz cwngqgix goz coz.
Nanz ndaej ndoj ginzcungq.
188
連
Cimeij dem gungh cij.
Gauj gvaej giq im mouz.
Haih sam me lwg raeuz.
Mbouj hab aeu louz mingh.
189
色
De sieng dien haih lij.
Mbouj baubiq vaiq hin.
Buenq cimeij swj hingz.
Coj ndaej bingz minz faenq.
口承文芸 