1
Dieg raeuz ndaem song sauh
Haeux gwn lauq gwn lw
Nanz vi lwg dong bwz
San goz mwz dingj donq
2
Aen fae gi naex mbin
Cij namz cim mbaeuj byienq
Byaij mbaeuj deng fueng yiengq
Loeng ij ienq baeux rawz
3
Lwg bae hag gouj siq
Meh cingh ij ra yw
Mwngz sw siengj huz duz
Cij hoj gw diuz naex
4
Gij naex byaek daeuz saiq
Cawj mwngz caiq dwk gyu
Gingq sik daek ma gw
Mbaeuj cunj lw ndaw deb
5
Duz gaeq song gaiq sonj
Mbangj ywngz ronq mbaeuj baenz
Saeq yoj saeq dwg caengz
Luj ron laeng mbaeuj laux
6
Caeuq vunz umj lwg lan
Vih liux ranz dox gaenh
Hong yaengq mbaeuj yaeuq gaenj
Lau naj yaenq vunz raen
7
Ciengx ma gyoiq hwnj saen
Mbaeuj hawj gaen bae raeh
Roeb vunz mbaeuj aeq saeq
Caeuj naj noix lai rawz
8
Yoj gwx mwngz ngengh iq
Cawj baenz ndij haeux san
Daiq doengz ha cungj cang
Maih hanz gwx mwngz gax
9
Bangx lingq bae gueg roih
Ij ok oiq daj hauz
Vih cingq lueng cingq cauz
Haj saij lau raemx dumh
10
Gwnz faeuj doengj yienz hung
Hong hwnj rumz cix roh
Gaez naeuz yiengh rawz hoq
Ngoenz naex raex rox cij daengz
11
Mwngz ngamq cib sam saeq
Daenj saeq ngaeh max haiz
Naeuz mwngz miz ngaenz lai
Haj naeuz gvai cang maj
12
Diq banj dauj caej niz
Moed mbaeuj miz dieg ndaenj
Mbaeuj luj ranz saez gonq
Congh ndij congh gueg rongz
13
Duz max ngamq samj sam
Aen an aiq haj bak
Gwih mbaeuj gwih cix sat
Gveng gvak cag hawj vunz
14
Doengh baez cangh suj baq
Suenq vaebz yaj ndoi hai
Sanj bimj ok daeuj lai
Lauj ciu baiz dauj biq
15
Dam doz lauh hwet naet
Lab laux baeg caem hong
Gax gonq de baenx dong
Gaenj laeng gonz mbaeuj naek
16
Noh yiengz diem noh maeu
Gaej swq yaeuz cangq ciq
Yienz gah vunz gaeuj dij
Gaeuj vaeq ij fuz hoz
17
Gyangj ngoenz amq bak ndoeng
Mbangj goeng siengj bae lax
Fanj lae saek ciengh baj
Ngoenz maz gaq ndaej daengz
18
Rek naex raemx dang haj
Faez ngamq byah dawz roengz
Sauz fob dwk bak bomz
Hoz loengz bom bwq cuij
19
Raemx haij di saeh soq
Caemh mbaeuj goj ndaej liengz
Ma yangx ma cah suen
Duz meh yiengz gaej ndaenj
20
Laj mbanj haq gwnz haw
Mbaeuj lau ngawz daj ceuj
Mbaeuj goq buh vaq seuq
Cix gyaj euq song ngoenz
21
Byaj raez gonq raez rengx
Vunz daj senq cangj uz
Doek gaej ndek fwnj mu
Gaeu cungj fuz ndang mbaeq
22
Uj siz haw loeg gaeuq
Sawq sae faeuh loeg yienz
Song mbiengj caengz hoij gyienz
Raeuj rawz sieng byawz rox
23
Uj ciz lingz lai gaenj
Yaeuz maenz daemh cix bae
Daux luq coih caengz ndae
Camq ciz hoi sam dangj
24
Cawj haeux nan mbaeuj byaeuz
Ndaq meh gaeu gvek gvek
Mwngz dwk faez mbaeuj bek
Aiq naeuz rek de na
25
Ciz dij hong nganq gyienq
Cwz meh gyiengq vaiz hung
Dawz bae cae naz rum
Ceux gat ywngz lij diuq
26
Dangh goengj sae caq yaeuz
Vunz byaeuq naeuz mbaeuj ndaej
Hauh mbaeuj miz baenj saeh
Cij ndaej gaex daih ciz
27
Get cib ngaeh yied nit get
Mwi roengz net roengz na
Gyoengq cangh ruz dwk bya
Mbaeuj sa maz haeuj ndok
28
Faeux yienz siuj fung sij
Gvaiq mbaeuj ciq mingz daeuz
Raen vunz daeq raeuj ngaeuz
Caeuh doq naeuz huz siengh
29
Cawx daeuz saiq ma gw
Caiq yiem gyu de cwt
Ma lwg yax ma lwg
Rox naj guk rox ndui
30
Saek maeux naz daiq raeh
Ij ciengx haeq siet hinz
Donq gw baenz daeuj lingz
Cienz camq dingz mbaeuj gangj
31
Caux faez dwk baenx dong
Muengh sae goeng din yag
Ndaw fwngz caemh miz fap
Caengj sawq dab hawj ngonz
32
Bangx mboq bae cawx raemx
Nod doz caengh gvuenj sien
Dangh naeuz mboek cix dienz
Liengh mbaeuj cienz dax ngoj
33
Yaeuq bi gvaq raeb gaeuq
Moh raemx haeuj baeq ciz
Gya dingz ndoi ndiq ndi
Goeq mbaeuj miz raen mamx
34
Mbaeuj duenz gyez simj baj
Cap max dwk dox ceng
Mbwengj naeuz mbwengj mbaeuj deng
Miz bangz bien bingz lunq
35
Aen mbanj iq gaej gya
Gaej naeuz ma mbaeuj yak
Daenj buh vaih buh yag
Yoj vak mbaeuj vak mbaeuj rawz
36
Mbaeuj siengj haq lai ranz
Caiq deng gvan din bap
Dawz rap hix mbaeuj ak
Cingh hab rag caij naez
37
Hoh naex byai faex dan
Rox cang baenz cij dig
Dangh baeux rawz loq gyik
Doq vit gueg doengz faez
38
Cib yied donq donq roj
Hauj saij goq daeuz liengz
Baez hoengq bae gaej ndwen
Aiq ndij bwengz bae ciq
39
Gyau ndwen ngaeh ndwen sam
Gw byaek rangz caemh faeh
Vih gaeu bonj cienz naex
Cij ciengx haeq ha gvez
40
Doengh baeux vunz gumq gaeuz
Lix gyae naeuz aemq bauq
Yaeuq baq faez bangx cauq
Hangz gauq caemh ha biz
41
Rod Riuz mbanj fungz faz rod
Naeuz duz goep caet gaen
Gah gangj dwk soeg saenz
Baeux rawz raen de caengh
42
Cingj gyaj mbaeuj cau gyaj
Dwg cungq daq vaenq diz
Vih ciz gyen mbaeuj miz
Daih ngaeh giz caiq gyienq
43
Gaiq naex laeuj sam va
Caengj goeb fa dwk gaenq
Daq mangz saez hong yaengq
Daengj hat haemh ndaej gwn
44
Oi dak haeuj ndaeng vaiz
Yienz baenj laiz hoj yaeuq
Dongh caen mbaeuj ndaej saeuh
Gaej yungh haeuj can limz
45
Ciengh miz cienz raeuj vaq
Cij daeuj gah raeuj maeu
Mwngz dok gaeu cix aeu
Gaej yungh naeuz gvaij diuq
46
Lueg naex miz ywj lai
Vunz ciengx vaiz haenj daeuj
Saeq saez ndaej gwn gaeuq
Yaeuq mbaeuq yaeuq dox fungz
47
Bae max daeuz dox roeb
Daeuj haw loeg caiq yangz
Yauq gonq go naengj dangz
Dungx lij sang gvaq raeuj
48
Raengq raeuz daeuj cim gvan
Yienz mingz dangz loq yanj
Bak bi gwn bak mbanj
Lau vun gangj hab riu
49
Haq gueg sau ciep mienh
Bi song byienq noh buenz
Bae cienz raeuz mbaeuj vueng
Ciet cieng raeuz cungj byaij
50
Dauq laux baengz raemh ndaengq
Vunz aiq haenh naeuz baenz
Dangh daenj doengz ha ndaem
Ij goeng gaenz bae swiq
51
Cawx deng vaiz vengx dangz
Hwnq daengz ranz haemq ginq
Dangh cauz yangj mbaeuj imq
Cungj it dingh haenj gyauz
52
Doengh baeux cangh daj buenq
Aeu gaeuj liengx gueg gaen
Gaen noh cib maenz ngaenz
Gaej gwn gaemz daiq laeg
53
Yienz rox naeuz onj sae
Cungj siengz saez daeu vaq
Daengj yieb baengz diz gaj
Ndaej naih caj gaej bi
54
Bi naex rong faengx bengz
Gaej aeu denz ma duk
Duet vaq gueg bau bug
Cungj soengq lwg daq yoz
55
Dangh miz haeux baenz cang
Gaej ciq san boiz raeh
Gaeuj goj naeuz lumj naex
Coj cij ndaej gung bingz
56
Ngoenz naex ciet uj iz
Ciep dung ci daeuj naej
Dem raeuz soen minz vaej
Caez vanj vaeq hingq cuz
57
loz bo dem boj ban
Dwg san yang fuq ginq
Ciet haeq caez dox nginh
Cungj ndaej cingj daengz raeuz
58
Ranz gwnz gaj maeu hung
Raengq au lungz ranz laj
Ngaex yienz doiq mbaeuj gvaq
Vi meh baj gueg gvueng
59
Vaiz moq lak coengq lunz
Raeuj ngiengx gwnz ngiengx lcj
Ywj raez yienz daih baj
Ij gwn gah ndang saenz
60
Ging yamq haeuj hangz doz
Siengj dox go cij daeuj
Saez naex soz liuq caeux
Liengq vunz gaeuj mbaeuj raen
61
Cawx goep deng gungq saeu
Yaeuq mbaeuj yaeuq caemh fungz
Gaeu raengq hoij au lungz
Ij maj gwn cij rox
62
Swh cungj swj gaij gwz
Ndaem duh luz song sauh
Baej doengh baez dangq laux
Daeuh faeuh dauj fanj bengz
63
Saez naex yungh vanj dez
He lwg ngez loq yak
Det di cix baemz bag
Lwengh mbaeuj ndat daengz roeuz
64
U gaeq hangh biz lauz
Hong cingh lau mbaeuj raeq
Dangh naeuz vaih haeux raeh
Ij mbon dax haex aeu rawz
65
Doengh baeux goengz dungx iek
Raen byiek dumq daih samz
Goenj laeng cawj naengj dangz
Dungx hix sang gvaq raeuj
66
Lak gueg bawx yax vuengz
Rap gyoi luenz loq yaenq
Ma daengz ndaej gaej haemh
Mbaeuj lau aeu raemx loeng ranz
67
Bi naex fungz song cun
Yienz doek fun lai daeh
Dumh naz cix lij raeh
Aeu gve saeq cawj ngaiz
68
Noh maeu meh hwnj gyaq
Yienz hab gaj dienz haw
Dangh hek sanq bae rawz
Ij miz byawz daeuj gah
69
Cib ngaeh ndwen gueg bi
Lig dungj iz inq bwq
Gah laeb mbaeuj ciuq guj
Lau giq duq mbaeuj dawz
70
Vih gamj mauq liuz hingz
Lai baenz dingz maenz cimj
Ngaenz de goj gvuen dingh
Ij ciuq bingh roengz yw
71
Baeux cwng cej caek cej
Heuh dax geq mbaeuj baenz
Bya dah ndaej luenh yaemz
Bya daemz nanz ndaej dwk
72
Vunz meh yienz ak mbon
Hoeng gueg hong mij loh
Diuz vaq naex lij moq
Fong raeuj hoq hoj ngonz
73
Gueg ranz ngamq an din
Mij caej bingz rawz gax
Dwg cienj cingz cij maq
Vunz caemh ndaq goengj sae
74
Haeux maex ndaej ndih gon
Guenq daih dong rawz gax
Rek aeuq yienz caemh aq
Bae bak baj gaen fwnz
75
Heng ij aeu faex genq
Cax ij genj bingz namz
Cangh de neb caengz raen
Naej boh ranz ij yungh
76
Dieg vunz maj hiq duenz
Gvaq fueng fueng dit bingj
Hwnj cag bae gaemz gingq
Vunz iet linx gaenj laeng
77
Cang ek diuq fwx fwh
Baeux gvej ywj caiq yunz
Dawz raeb duz vaiz hang
Dwk hawj vunz duet buh
78
Doengh baez vunz gueg ranz
Benj camh bam naeuz faeuq
Hwnq laeuz fangz hwnj daeuj
Ndaej dak haeux dauq gwnz
79
Cangq haij di caeuj biuj
Mbaeuj ca miuj ca faen
Yienz gau gyaq di ngaenz
Cungj saenz saenz haenj daiq
80
Mbanj cimz coengq bauq rin
Mbin sinz daengz haw loeg
Hauh naeuz mbaeuj daenj gyaep
Caemh doq doek deng rwz
81
Caengj gam miz loeg mboq
Mbaeuj hoj yoj faen lungz
Gvuenj mwngz rengx luh mbun
De cungj ywngz fung sanj
82
Ranz ranz cungj miz gwn
Mbaeuj miz vunz gauq vaq
Maeu sam ndwen ndaej gaj
Baengh cingq daq yoz yangz
83
Dauq laux geng raeh naz
Mbaeuj rox maz ndaej faeuq
Ciq cangz gai fangq daeuj
Cawx baenx raeuh giq ce
84
Hoz buj denq gvang bauq
Cungj gvangj gauq baenz lueng
Ca caej daeuj dwg ueng
Gueg dwk rieng cung gat
85
Gwih max gwnz daengq raez
Cij miz gaez rawz lingq
Aeu dingh buenz ma dingh
Cij lingh mwnq rawz sien
86
Miz daemz mbaeuj yaeuq hoengq
Mboengj ma loengh byaek ngaiz
Saez naex bya ndaej lai
Caez baenq vaiz hwnj hamq
87
Coengq ruz roengz daih gyang
Ra diuz gan hamq ginq
Dangh baeux rawz mbaeuj sinq
Goj naengz mingh mbaeuj lw
88
Doengh gyoengq cangh daj daeuq
Fat maeg daeuj gueg bingz
Gangj cien fanh cung mingz
Cim doiq cim dox dingj
89
Doengh mwnq vangz dauq can
Vunz ging cangz mbaeuj mbwq
Coj it daengz cib ngux
Luj rwi gyuj va lanz
90
Saeq duenh riuz i lingj
Fung gingj daih it mingz
Gingj vaeq naengh bak dingz
Gyau yienq gim coj haeuj
91
Caengz muenx cib bi cuk
Caeuh gueg lwg ciengx vaiz
Hanz mbaeuj baeq baenz lai
Fuk dem caiz gah raeb
92
Gaeu aen daemz naex iq
Ciengx bya mij ndaej hung
Faen gaej laeq hawj mwngz
Saed doiq vunz fuz naj
93
Gaiq naex bij hiq go
Ndaej fuz hoz mwngz mbaeuq
Soengq hawj mwngz gaej saeuj
Vih gvaq haeuh liuz cenz
94
Vih ij gauj vaenz yoz
Daeuj cung goz saij fangj
Suenq gwx mwngz naengz ganq
Ndaej bauj cangq cauz liuz
95
Vaeq swj saed gvan sim
Vih hinz minz gungq yienq
Gah yiengh di diuz gyienq
Ndaej faz senj senz duz
96
Baenj goz di can go
Dem vaiq goz gyau vangj
Gyau hawj mwngz saij fangj
Lau gangj mbaeuj dox doengz
97
Dangh sieng ca gaiq maz
Mwngz bae ma siu gaij
Buq faz gengq gya gvaiq
Vih ciq gyaiq yinz minz
98
Baenj hauh cwng cangj hungz
Gvau hawj mwngz vaeq swj
Maeuq rawz miz soq nguq
Cingj bang suq son gaeu
99
Swq vah dem yienq bingz
Daeuj luz im yienj cangq
Gvaeq gimz bau langj soengq
Hawj cenz dungj bauj laeuz
100
Sam goq gangj daengz naej
Miz gi vaeq caiq byien
Can go caeuj faz yienz
Aenj sim lienz vaeq swj
1
Vaiq bin daeuj laeng raeuz
Sim gwx gaeu vuen haej
Gyau baengz yaeux vanq saeq
Lwg lan gaeq mbaeuj lumz
2
Cung hiz ndaej gyau gvan
Daeuj daengz ranz saij fangj
Diq gyaeuz gvangq yah gvangq
Byaij gaej fanh lij cingz
3
Vaeq swj gauj goh nenh
Vih laeuz cenz haeuq daiq
Raeuz uj huz swq haij
Ij gya gvaiq buq faz
4
Cangq cuz raeuz roengz daeuj
Daj guj gaeuh laeuz cenz
Yinj caej ij swh yienz
Gaeq cien nienz vanq daiq
5
Vih cenz dungj bauj laeuz
Dwg faenh raeuz yimq muq
Cangq yangh raeuz gag bux
Caez gungj guq roengz bae
6
Gyoengq cing nienz go caeuj
Ciengq gaej saeuj minz go
Gaiq naex dwg cung goz
Dieg loz bo sing diuq
7
Hawj siuj cej cen gya
Dawz baej ma laeuz niemq
Namz nij raeuz sim yienq
Yungj yienj mbaeuj dox lumz
8
Vih cung hiz vaenz vaq
Giq vaq daengz cang laiz
Byaeu caej bingz mbaeuj lai
Camq an baiz gaej saeuj
口承文芸 